ബാഴ്സ വിടുന്നു; കൂടുമാറ്റം മെസിയുടെ പഴയ തട്ടകത്തിലേക്ക്
ബാഴ്സലോണയുടെ സ്പാനിഷ് മുന്നേറ്റനിര താരം ഫെറാൻ ടോറസ് ഫ്രഞ്ച് ക്ലബ്ബായ പാരിസ് സെന്റ് ജെര്മെയ്നിലേക്ക് (പി.എസ്.ജി) കൂടുമാറാൻ ഒരുങ്ങുന്നതായി റിപ്പോർട്ട്.
തന്റെ അടുത്ത സുഹൃത്തുക്കളോടും പ്രതിനിധികളോടും ടോറസ് ഇക്കാര്യത്തിലുള്ള താത്പര്യം ഇതിനോടകം പങ്കുവെച്ചിട്ടുണ്ടെന്നാണ് പ്രമുഖ സ്പോര്ട്സ് മാധ്യമമായ ‘ഫൂട്ട് മെര്ക്കാട്ടോ’ റിപ്പോര്ട്ട് ചെയ്യുന്നത്.
തകർപ്പൻ ഫോമില് ഫെറാൻ ടോറസ്
2022 ജനുവരിയില് മാഞ്ചസ്റ്റർ സിറ്റിയില് നിന്ന് ബാഴ്സയിലെത്തിയ ടോറസ്, ക്ലബ്ബിനായി ഇതുവരെ 207 മത്സരങ്ങളില് നിന്ന് 65 ഗോളുകളും 23 അസിസ്റ്റുകളും നേടിയിട്ടുണ്ട്. 2025-26 സീസണില് ലാ ലിഗയില് 33 മത്സരങ്ങളില് നിന്ന് 16 ഗോളുകള് നേടി താരം തന്റെ കരിയറിലെ ഏറ്റവും മികച്ച പ്രകടനമാണ് പുറത്തെടുത്തത്.
കൂടാതെ, 2026 ഫിഫ ലോകകപ്പ് ഫൈനലില് അർജന്റീനയ്ക്കെതിരെ സ്പെയിനിനായി എക്സ്ട്രാ ടൈമില് വിജയഗോള് നേടിയതും ഫെറാൻ ടോറസ് ആയിരുന്നു. ഈ തകർപ്പൻ പ്രകടനമാണ് താരത്തെ യൂറോപ്യൻ ചാമ്പ്യന്മാരായ പി.എസ്.ജിയുടെ ശ്രദ്ധയിലേക്ക് എത്തിച്ചത്.
പി.എസ്.ജി നീക്കവും ബാഴ്സയുടെ നിലപാടും
ടോറസിന്റെ പ്രകടനത്തില് ആകൃഷ്ടരായ പി.എസ്.ജി, താരത്തിന്റെ ക്യാമ്പുമായി നേരിട്ട് ബന്ധപ്പെട്ടിട്ടുണ്ട്. അടുത്ത ആഴ്ചയോടെ ബാഴ്സലോണയുമായി ഔദ്യോഗിക ചർച്ചകള് നടത്തി ട്രാൻസ്ഫർ തുകയില് ധാരണയിലെത്താനാണ് ഫ്രഞ്ച് ക്ലബ്ബിന്റെ ശ്രമം.
ടോറസിനെ എളുപ്പത്തില് വിട്ടുനല്കാൻ ബാഴ്സയ്ക്ക് താത്പര്യമില്ലെങ്കിലും, ഈ ട്രാൻസ്ഫർ ജാലകത്തില് കരീം അഡെമി, ആന്റണി ഗോർഡൻ തുടങ്ങിയ മുന്നേറ്റനിര താരങ്ങളെ അവർ ടീമിലെത്തിച്ചിട്ടുണ്ട്. അതിനാല് താരത്തിന്റെ കൂടുമാറ്റം ബാഴ്സലോണയ്ക്ക് വലിയ തിരിച്ചടിയായേക്കില്ല. ഫെറാൻ ടോറസിന് പുറമെ ബാഴ്സയുടെ സ്റ്റാർ മിഡ്ഫീല്ഡർ പെഡ്രിയെ സ്വന്തമാക്കാനും പി.എസ്.ജി 90 മില്യണ് യൂറോയുടെ ഓഫറുമായി രംഗത്തുണ്ടെങ്കിലും, യുവതാരത്തെ ക്ലബ്ബ് വിട്ടുനല്കാൻ സാധ്യതയില്ല.
